பிரபல தயாரிப்பாளர் ஜிகே ரெட்டியின் மகனான விஷால், செல்லமே படம் மூலம் கதாநாயகனானார்.
சண்டக் கோழி படத்தில் முன்னணி நடிகராகிய இவர் தொடர்ந்து ஹிட் படங்கள் கொடுத்தார்.
இவற்றில் பெரும்பாலானவை அவரது தந்தையின் ஜிகே பிலிம் தயாரித்தவையே. இப்போது தன் பெயரிலேயே புதிய பட நிறுவனம் ஒன்றை தொடங்கியுள்ளார்.
இந்த ஆண்டு தொடர்ந்து சமர், பட்டத்துயானை ஆகிய இரு படங்கள் அவர் நடிப்பில் வெளியாகியுள்ளன.
இவற்றைத் தொடர்ந்து மதகஜராஜா அடுத்த வாரம் வெளியாகவுள்ளது. சுசீந்திரன் இயக்கத்தில் இப்போது பாண்டிய நாடு படத்தில் நடித்து வருகிறார் விஷால்.
இந்தப் படத்தின் படப்பிடிப்பில் தனது 36வது பிறந்த நாளை இன்று கொண்டாடினார் விஷால். அவருக்கு இயக்குனர் சுசீந்திரன் பெரிய மலர்க் கொத்து கொடுத்து வாழ்த்துக் கூறியுள்ளார்.
படப்பிடிப்புத் தளத்தில் கேக் வெட்டிய விஷாலுக்கு நடிகை வரலட்சுமி, நடிகர் விக்ராந்த், அவர் மனைவி, ஸ்டன்ட் மாஸ்டர் அனல் அரசு, கேமராமேன் மதி உள்ளிட்டோர் வாழ்த்தியுள்ளனர்.
மேலும் விஷாலின் ரசிகர்களும் திரண்டு வந்து இந்த பிறந்த நாளில் கலந்து கொண்டுள்ளனர்.
